ⵄⴰⵣⵉⵣ ⴰⵅⵏⵏⵓⵛ
ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⴰⴳⵔⴰⵡⴰⵏ ⵏ ⵓⴳⴰⴷⵉⵔ
ⴰⴳⴰⴷⵉⵔ, ⵜⵉⵖⵔⵎⵜ ⵉⵎⵎⴰⵍⵏ ⵜⴰⵏⴽⵔⴰ ⵙ ⵡⴰⵏⴰⵡⵏ ⵏⵏⵙ.
ⵙ ⵡⴰⵍⵍⴰⵙ ⵏ ⵜⵓⵚⴽⴰ ⵏⵏⵙ ⴹⴰⵕⵜ ⵏ ⵜⴰⵙⵙⴰⵙⵜ ⵏ ⵓⵏⴷⵓⴷⵉ ⵏ 1960, ⵙ “ⵜⵉⵔⴰⵜ ⵏ ⵓⴳⵍⵍⵉⴷ ⴷ ⵓⴳⴷⵓⴷ ⵏⵏⵙ”, ⵜⴷⴷⵔ ⵜⵖⵔⵎⵜ ⵏ ⵓⴳⴰⴷⵉⵔ ⴰⵙⵙ ⴰⴷ ⴳ ⵓⵏⵣⵉⵣ ⵏ ⵜⵏⴽⵔⴰ ⵏⵏⵙ ⵜⵉⵙⵙ ⵙⵏⴰⵜ.
ⵙ ⵓⵖⴰⵡⴰⵙ ⵏ ⵜⴳⵎⵉ ⵜⴰⵖⵔⵎⴰⵏⵜ (PDU) ⴷⴰ ⵉⵙⵙⵏⵜⵉ ⴱⴰⴱ ⵏ ⵡⴰⴷⴷⵓⵔ ⴰⵎⵇⵇⵔⴰⵏ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙⵙ ⵚⴹⵉⵚ, ⴰⴷ ⵜ ⵉⵏⵚⵕ ⵕⴱⴱⵉ, ⵜⴷⴷⵔ ⵜⵖⵔⵎⵜ ⴳ ⵢⴰⵏ ⵓⵙⵏⴼⵍ ⴰⵖⵔⵎⴰⵏ ⵜⵜ ⵉⵏⵏ ⵊⵊⵓⵏ ⵓⵔ ⵉⴽⴽⵉⵏ.
ⵙ ⵜⴰⵢⵔⵉ ⵏ ⵜⵖⵔⵎⵜ ⵏⵏⵖ, ⴷ ⵜⴷⵔⴰⵡⵜ ⵏⵏⵖ ⵜⴰⵏⴰⵎⵓⵔⵜ, ⴷⴰ ⵏⵙⵙⴷⵓⵙ ⴰⵙⵙ ⴰⴷ ⵜⴰⴷⵉⵏⴰⵎⵉⵜ ⴰⴷ ⵙ ⵜⴱⵔⵉⴷⵜ ⵏ ⵓⵖⴰⵡⴰⵙ ⵏ ⵜⵡⵓⵔⵉ ⴰⵎⴽⴰⵢⵍⴰⵍ ⵉⵥⵍⵉⵏ ⵉ ⵓⵣⵎⵣ ⵏ 2022-2027.
ⵙ ⵓⵙⵔⵙ ⵏ ⵓⴼⴳⴰⵏ ⴳ ⵡⴰⵎⵎⴰⵙ ⵏ ⵉⵙⵉⵣⵡⵔⵏ ⵏⵏⵙ, ⵜⴳⴰ ⵜⴽⴰⵕⴹⴰ ⵏⵏⵖ ⵏ ⵓⴱⵔⵉⴷ ⵢⴰⵜ ⵜⵢⴰⴼⵓⵜ ⵏ ⵜⵓⴳⵜ ⵏ ⵢⵉⵔⵏ ⵏ ⵓⵙⵙⴼⵍⴷ ⴷ ⵓⵎⵛⴰⵡⴰⵕ ⴷ ⵓⵙⵏⴼⵍ ⵏ ⵉⵎⵏⴰⴷⵏ ⴰⴽⴷ ⴰⵢⵜ ⵓⴳⴰⴷⵉⵔ ⴷ ⵜⵣⵎⵎⴰⵔ ⴰⴽⴽⵯ ⵜⵉⵎⴰⴷⴷⴰⵔⵉⵏ ⴳ ⵜⵖⵔⵎⵜ.
ⵉⴳ ⵓⵍⴰ ⴰⵎ ⵜⴰⴱⵔⵉⴷⵜ ⵜⴰⵎⴷⵔⴰⵡⵜ ⵜⴰⵎⵙⵙⵉⴷⴼⵜ, ⴷⴰ ⵔⴰⴷ ⵉⵙⵡⵓⴷⴷⵓ ⵜⵉⵡⵓⵔⵉⵡⵉⵏ ⵏⵏⵖ ⵏ ⵖⵉⵍⴰⴷ ⴷ ⵜⵉⵏ ⵉⵎⴰⵍ, ⴰⴼⴰⴷ ⴰⴷ ⴷ ⵜⵙⵙⴰⵖⵓⵍ ⵜⵖⵔⵎⵜ ⵉⵣⴷⴷⵓⵢⵏ ⴷ ⵓⵎⵣⵔⵓⵢ ⵏⵏⵙ.
ⴰⴳⴰⴷⵉⵔ, ⵜⴰⵏⵉⵍⴰ ⵜⴰⵏⵎⴰⵍⵍⴰⵢⵜ ⵎⵓ ⵎⵏⵏⴰⵡ ⵓⴷⵎⴰⵡⵏ, ⵔⴰⴷ ⵜⴷⵡⵍ ⵙⴳ ⴰⵙⵙ ⴰⴷ, ⵢⴰⵏ ⵓⵙⴼⴰⵢⵍⵓ ⴰⵏⴰⵎⵓⵏ ⴰⴷⵎⵙⴰⵏ ⵉⵜⵜⴳⴳⵏ ⵜⴰⵡⴰⵏⵜ, ⵍⵍⵉ ⵔⴰⴷ ⴷ ⵉⵏⵣⵖ ⵉⵎⵙⵙⴰⵔⵓⵜⵏ ⵏ ⵉⴷⵉⵔⵏ ⴰⴽⴽⵯ.
ⵙ ⵓⵙⴷⵓⵙ ⵏ ⵜⵎⴰⴳⵉⵜ ⵏⵏⵙ, ⴷⴰ ⵜⵙⵙⴰⵔⴰⵎ ⵜⵖⵔⵎⵜ ⵏ ⵓⴳⴰⴷⵉⵔ ⴰⴷ ⵜⴳ ⵜⴰⵎⴰⵥⵓⵏⵜ ⵏ ⵜⴷⵍⵙⴰ ⵜⴰⵎⴰⵣⵉⵖⵜ, ⴷ ⴰⴷ ⵜⴰⵡⵙ ⴳ ⵜⵙⵃⴹⴰⵡⵜ ⵏ ⵜⵎⴽⵜⵉⵜ ⵜⴰⵎⴳⵔⴰⵡⵜ ⴷ ⵓⴼⵔⴰⴳ ⵏ ⵜⴰⵢⵙⵉ ⵜⴰⴷⵍⵙⴰⵏⵜ ⵜⴰⵣⴰⵢⴽⵓⵜ.
ⴰⴳⴰⴷⵉⵔ ⴷ ⵜⵉⵖⵔⵎⵜ ⵜⴰⵄⵔⵔⵉⵎⵜ, ⵖⵓⵔⵙ ⵜⵉⵣⵎⵎⴰⵔ ⴰⴽⴽⵯ ⴷ ⵉⵙⵓⵍⴼⵏ ⴰⴼⴰⴷ ⴰⴷ ⵜⴳ ⵜⵉⵖⵔⵎⵜ ⵏ ⵜⴷⵍⵙⴰ ⴷ ⵜⵓⵏⵏⵓⵏⵜ, ⵙⵉⵏ ⵉⴳⵔⴰⵏ ⵉⴷⵙⵍⴰⵏⵏ, ⴷⴰ ⵉⵙⵎⵓⵏⴰⵏ ⵏⴳⵔ ⵜⵏⵏⵓⵣⵖⴰ ⴷ ⵓⵙⵉⵍⵉⵢ ⵏ ⵜⵎⴼⴽⵉⵜⵉⵏ ⵜⵉⴷⵖⵔⴰⵏⵉⵏ ⴷ ⵓⵙⵓⵎⵏ ⵏ ⵜⴰⵙⵓⵜⵉⵏ ⴷ ⵢⵓⵙⴰⵏⵉⵏ.
ⵜⵡⴰⵜⵜⵙ ⵜⵖⵔⵎⵜ ⵏ ⵓⴳⴰⴷⵉⵔ ⴰⵙⵙ ⴰⴷ, ⴰⴷ ⵜⴷⵡⵍ ⵜⵉⵖⵔⵎⵜ ⵜⴰⵎⵇⵇⵔⴰⵏⵜ ⵜⴰⵎⵉⵖⵉⵙⵜ ⴷ ⵜⴼⴰⵛⵛⴰⵢⵜ ⴷ ⵜⵙⵓⵍⴰⵏⵜ, ⵉⴳⴳⵏ ⵢⴰⵏ ⵓⵙⴰⵜⵉ ⵏ ⵜⵓⴷⵔⵜ ⵉⵥⵉⵍⵏ ⵉ ⵉⵏⵎⵓⵔⵉⵜⵏ ⵏⵏⵙ ⴷ ⵢⴰⵜ ⵜⵉⵔⵎⵉⵜ ⵓⵔ ⵉⵜⵜⴰⴼⵓⴹⵏ ⵉ ⵉⵏⵔⵣⴰⴼ ⵏⵏⵙ.
ⴰⴳⴰⴷⵉⵔ ⴰⵙⵙ ⴰⴷ, ⴰⵙⵖⵏⵓ ⵏ ⵜⵖⵔⵎⵜ ⵜⴰⵎⵇⵇⵔⴰⵏⵜ ⵢⵓⵜⵏ ⵙ ⵉⵥⵓⵕⴰⵏ ⴳ ⵓⵎⵣⵔⵓⵢ ⵏⵏⵙ, ⵜⵡⵛ ⵜⵉⵡⴰ ⵏⵏⵙ ⵉ ⵢⵉⵎⴰⵍ.
ⵎⴰⵕⵕⴰ, ⴰⴷ ⵏⵎⵓⵔⵙ ⴳ ⵜⵙⴰⵡⵏⵜ ⵏ ⵜⵖⵔⵎⵜ ⵏⵏⵖ ⵙ ⵡⴰⵏⵙⴰ ⴷⴰ ⵉⵔⴰ ⴱⴰⴱ ⵏ ⵡⴰⴷⴷⵓⵔ ⴰⵎⵇⵇⵔⴰⵏ ⴰⴷ ⵜ ⵉⵏⵚⵕ ⵕⴱⴱⵉ: ⴳ ⵡⴰⵎⵎⴰⵙ ⵏ ⵍⵎⵖⵔⵉⴱ ⵉⵜⵜⵎⵓⵙⵙⵓⵏ, ⵜⴰⵡⵓⵔⵜ ⵖⵔ ⵜⴷⵔⵓⵜ ⵏⵏⵙ ⵜⴰⴼⵔⵉⵇⵉⵜ